Nakapanood ka na ba ng Pinoy action movie?

Nakapanood ka na ba ng Pinoy action movie? Eto ang ilang palatandaan na ang pinapanuod mo ay bakbakang noypi.

- Umiikot ang istorya sa paghihiganti.

- Ni-rape ang kapatid ng bida o pinatay ang kamag-anak nya (nanay, tatay, ate, kuya, kinakapatid, kabiyak, syota, kulasisi, anak, pinsan, tiyo, tiya, lolo, lola , ninong, ninang, apo, apo sa tuhod, apo sa talampakan, ninuno.

- Isa sa mga eksena e babastusin ang bida, o ang syota nya, ng mga nag-iinumang istambay.

- Magkakagulo sa isang okasyon (kaarawan, kasal, binyag, burol).

- Hindi nakakaramdam ng sakit ang bida sa bakbakan, pero sisigaw ito at aaray pag ginagamot na ng leading lady ang mga sugat nya.

- Pag narinig mong tumawa ang isang character nang "bwahahaha", automatic- kontrabida 'yon.

- Pag may gagawing masama, tumatawa ang kontrabida. Kahit habang nanggagahasa.

- Smoker at mabisyo lagi ang kontrabida.

- Mahilig sa leather jacket ang kontrabida. Kahit buwan ng Abril at tanghaling-tapat.

- Ang structure ng mga kalaban: Ang Boss ang kanyang "mga bata".

- Ang kuta ng mga kalaban e sa warehouse o malaking bahay.

- Lagi ding may eksena sa isang beer house.

- May seksing leading lady at may bed scene na pwedeng ikwento sa Abante.

- Pagkatapos ng nagbabagang bed scene ay mahinhin na ulit ang leading lady.

- Kung mako-corner ang bida, hindi ito papatayin, ikukulong lang at pahihirapan, dahil lagi syang gustong mahuli nang buhay ng big boss.

- Mag-uusap ang bida at ang mortal na kalaban nito habang nagtututukan ng baril... mahabang pag-uusap, parang balagtasan, tila baga mag-syotang nasa telepono.

- Mura lang ang baril at pwede itong itapon kung wala ng bala.

- Makakapulot ang bida ng baril na may bala tuwing kinakailangan.

- Marunong at asintado sa baril ang leading lady kahit na hindi pa sya nakakahawak neto sa buong buhay nya.

- Kaya ng bida ang dalawampung tao sa bakbakan dahil hindi naman sila sumusugod nang sabay-sabay, laging isa-isa.

- Hindi tinatamaan ng bala ang bida kahit na tatlumpung tao ang bumabaril sa kanya, pero lahat sila tinatamaan nya.

- Tamaan man sya ng bala ay laging daplis lang... bawal sa ulo o sa puso.

- Siyam ang buhay ng bida.

- Doble pa nito ang buhay ng leading lady.

- Kung mamamatay man ang isa sa kanila e makakapagsalita pa ito ng isang page na script bago malagutan ng hininga.

- Pagkatapos pakinggan ang farewell speech, titingala ang naulila at isisigaw ang pangalan ng namatay.

- Pero hindi lubusang nagiging ulila ang bida dahil kadalasan itong merong spare na partner.

- Huling darating ang maraming pulis at didiretso agad sila sa pag-aresto sa mga kalaban. Oo, parang may palatandaan sila kung sino ang mga kalaban... at wala silang pakialam sa bida, kahit na sangkot ito sa riot.